अलैया बलैया या कि बल्ला उपला

मुंबई
17 अक्टूबर।

आज भोरहरे तेरे खिड़की के पास बइठि क यू सोचित आए कि का वाकई मा ऊई सारी बातै बिला जइहैं, जिनका देखि के हम पंचे बड़े भएन। काल्हि मुंबई म बहुत गर्मी रहै, टेंपरेचर 37 डिग्री के आसपास रहै। शाम क तनुक मौसम जुड़ान तो हम कहा कि चलौ थोड़ी द्यार टहिल लीन जाए। टहलत टहलत बड़ी देर हुइगै और तेहिलेहे हमार याके संगी होनै आईगे। खाना खाएक वक्त हुइगा रहै तो हम पंचै चले गेन पास क याक रेस्टोरेंट मइहां।

बात चलि परी दिल्ली ते शुरू भै हिंदी अख़बार नई दुनिया केरि। एहि की संडे मैगज़ीन में एकु लेख होली क्यारो छपा रहै। एहिका हिंदी क्यार याके बड़े लेखक लिखा हइन। ऊ लेख म पंडित जी लिखेन कि उई होली में अलैया बलैया डारै जात रहैं बचपन मा। और या बात उनका अबहूं याद है। होली जलावे के बाद और अगिले दिन होली मनावे क किस्सौ ऊई बहुत विस्तार तेरे लिखेन। हम अपने साथी त यौ पूछा कि अच्छा बताओ अलैया बलैया होली म डारी जाती हैं कि दीवाली म। ऊई भौचिकिया गे। कहै लाग हां अलैया बलैया डारी जाती हैं, हमहूं गे हन डारै। लेकिन हम कहा सवाल क चकरघिन्नी ना बनाओ, यू बताओ कि अलैया बलैया होरी म डारी जाती हैं कि दीवाली म। ऊई कहै लाग अरे अलैया बलैया वहै ना जेहिम उपला वुपला डारे जात हैं। हम कहा सनई जानत हौ। तनिक द्यार तक ऊई सोचेन फिर कहै लाग कि हां वा सफेद वाली रस्सी जेहिते खटिया कि अरदवाइन कसी जाति है। हम कहा खूब पहिचान्यौ। तो हम पूछा कि या सनई की रस्सी बनति कइसे है, ऊई कहै लाग कि अरे बिरवा में सफेद सफेद रेशा निकरत हैं, वही त रस्सी बनत है। हम कहा सरऊ सफेद रेसा बनै ते पहिले औरौ बहुत पापड़ बेलाई होति है। पहिले सनई के बिरवा जौन अर्हा के बेरवा के एत्ते लंबे लंबे होत हैं उनका काटि के गट्ठर बनाए जात हैं। फिर ई गट्ठर गांव के कौनो ताल तलैया म डारे जात हैं। भैया बोले- हां साफ करै खातिर। हम बतावा- कि साफ करै खातिर नाई, सरऊ सड़ावै खातिर।

जब सनई के बेरवा क्यार तना पत्ता सब दस पंद्रा दिन मा गलि जात हैं तो गट्ठर सूखै खातिर धूम म डारि दीन जाति हैं। फिर बेरवा केरि छाल सनई बन जाति है और वहिके तना केरि लकड़ी ईंधन केरे काम आवित है। एहिकौ सरसों के सूखे बेरवा की नाईं पिंजी कहा जाति है। हुई सकत है यूं नांव पिंजर तेरे बना होए। तो सनई की पिंजी क्यार छोट छोट गट्ठर बनाएक वहिंमा थ्वारा मकहरा (मकई क्यार सूख पौधा) बांधा जाति है। बांधे खातिर खटिया बिने तेरे बचिगा बान इस्तेमाल कीन जाति है। और यू जौन बनकि तैयार होति है वा है अलैया बलैया। और अलैया बलैया होरी म नाई बल्कि दीवाली म जलाई जाती हैं। बरसात के बाद घर की साफ सफाई त बचा कचरा गांव के बाहर जलावै की परंपरा बाद म सायद रस्मी बनिगै और अलैया बलैया वही क रूप है। होली म जौन चीज़ जलाई जाति है वहिका कहत है बल्ला उपला। ई गोबर तेरे बनत है। छोट छोट उपलन केरि बान तेरे माला बनाई जाति है और फिर ई माला लइके हम पंचौ जाइत रहै गांव के बाहर होली जलावै। हमार साथी बड़ी द्यार तक हमरी तरफ द्याखत रहे, उनके कुछ समझि आवा औ कुछ ऊई समझेक ड्रामा करत रहै। तो हम कहा कि संडे नई दुनिया क्यार ऊ अंक म हमरे दिल्ली वाले घर मा धरा है। अगली दांय जइबै तो लेते अइबे। हिंदी के तमाम धाकड़ कहै जाए वाले पुरान लेखक यू समझत हैं कि लोक परंपरा आज क्यार लोग बिल्कुल भुला गे हैं तो ऊई जो कुछ लिखि द्याहैं ऊ ब्रह्मा क वाक्य हुई जाई। अइस है नाई पंडित जी। अलैया बलैया अऊऱ बल्ला उपला म बहुत फर्क है और यू फर्क कम ते कम हमका त अबहूं याद है। आगे आवै वाली पीढ़ी क यू याद रही कि नाई पता नाई। नागर साहब तनुक हल्का हाथ धरौ।

कहा सुना माफ़,

पंकज शुक्ल

किस्सा पांडे सीताराम सूबेदार

बात आगे बढ़ावै ते पहिले पहिले तनुक बानगी द्याखौ। ई कुछ प्रसंग आहीं जउन याक अवधी किताब तेरे लीन गे हैं।

1. ठगी क्यार प्रसंग:....रात मा जब हमरे सब रुकेन तौ हमैं इहै सोचि-सोचि कै बहुत देर तक नींद नहीं आई कि ई सब ठग हैं! हम जागै कै पूरी कोसिस किहेन लेकिन थोडी देर बाद सोइ गयन! कुछै देर बीता कि हमार आंख मुर्गा के बांग अस आवाज से खुलि गय! हम उठि के बैठ गयन तो देखेन कि मजदूरन मा से एक-दुइ मनई हमरे लोगन के लगे हैं जे सोवत रहे! हम बहुत जोर से चिल्लायन और हमरे मामा तुरंतै तलवार लइ कै उनकी ओर लपके! ई सब पलक झपकत भय लेकिन तब तक ठग देवनारायन के भाई कै रेसम कै रस्सी से गटई घोंटि चुका रहे और तिलकधारी का बेहोश कई दिहे रहे! मामा तिलकधारी के उपर खडे ठग का काट डारिन और तिलकधारी कै जान बचि गय! यतनी देर मा ठग हमरे मामा कै सोना वाली जंजीर चोराइ लिहिन जेकर दाम अढाई सौ रुपया रहा और तिलकधारी कै तमंचा लै उडै! वहि समय पहरा देय कै जिम्मेदारी तिलकधारी कै रही लेकिन वै सोइ गय रहे! ....
2. लरिकवा क गोली मारै क्यार प्रसंग:.....एक दिन लखनऊ के लगे एक घरे मा कयू जने पकरि लिहा गए! वै सब सिपाही रहे! ओन्हैं पकरि कै, बान्हि कै हमरे रेजीमंट कै कमांडर के आगे पेस किहा गय और अगले रोज सबेरे आडर भय कि सबका गोली मारि दिही जाय! वहि समय फैरिंग पारटी हमरे जिम्मे रही! हम सिपहियन से ओनके नावं और रेजीमंट पूछेन! पांच-छह जने के बाद एक सिपाही वहि रेजीमंट कै नांव लिहिस जेहमा हमार बेटवा रहा! हम ओसे पुछेन कि का ऊ लैट कंपनी कै अनंती राम का जानत है औ उ कहिस कि ई वही कै नांव है! अनंती राम बहुत जने कै नांव होत है यहि मारे हम पहिले ज्यादा ध्यान नहिं दिहेन! दुसरे, हम पहिलेन मानि चुका रहेन कि हमार बेटउवा सिंध मा बुखार से मरि गय एहसे बात हमैं नहीं खटकी लेकिन जब ऊ कहिस कि ओकर गांव तिलोई है तौ हमार करेजा हक्क से होइ गय! का ऊ हमरै बेटवा रहा? यहि मा कौनौ सक नही रहि गय जब ऊ हमार नांव लइकै कहिस कि वै हमरे बाबू आंय! फिर ऊ हमसे माफी मांगत हमरे गोडे पै गिरि परा! ऊ अपने रेजीमंट के बाकी सिपहियन के साथे गदर मा चला गय रहा और लखनऊ आइ गय रहा! एक दायं जौन होय क रहा, होइ गय; ओकरे बद ऊ का करत? अगर ऊ भगहूं चाहत तौ कहां जात?ओन्हैं सब का संझा कै चार बजे गोली मारि जाय का रही औ अपने बेटवा का गोली मारै का काम हमहीं का करे का रहा! ई है किस्मत?......
3. काहे भा ग़दर :.....गदर कै आग मुसलमान लगाइन और हिंदू भेडी यस ओनके पीछे-पीछे नदी मा चला गए! बगावत कै असल कारन ई रहा कि सिपहिन का ताकत कै नसा होइ गय रहा और अफसरन के लगे ओन्हैं रोकै कै ताकत नहीं रही! एसे सिपाही ई समझि लिहिन कि सरकार ओनसे डेरात है जबकि सरकार ओनपै भरोसा करत रही, यहि मारे कुछ नही कहत रही! लेकिन केहु के बेटवा बागी होइ जाय तौ ओहका घरे से नहीं निकारि दीन जात! हमैं लागत है कि यहि गदर के लिए बागी बेटवा का जौन सजा मिली है ओकर असर बहुत दिन तक रही। .....भ्रष्टाचार पर विचार:.....बरतानी अफसर ई सुनिकै बहुत गुस्सा होइ जात हैं कि केहू घूस दिहिस है! ओसे पूछा जात है ऊ घूस काहे दिहिस! ओका सायद नहीँ पता होत कि ऊ मनई इहै सोचि कै घूस देत है कि घूस कै कुछ पैसा साहब के लगे जात है! यही मारे ऊ साहब से कुछ कहत नही काहे कि चपरासी से लइकै किलरक तक सब ओसे इहै कहत हैं कि पइसा सहबौ क गय है! हम यस कौनो दफ़्तर के बारे मा नहीं सुनेन जहां किलरक ई न कहत होंय कि साहब घूस लेत हैं! वै चाहत हैं कि घूसखोरी चला करै काहे कि ओनकै तौ जिन्नगी यही से चलत है! हमरे गांव कै पटवारी एक रोज हमसे कहिस कि हमरै गलती रही होई जौन हम्मैं तरक्की नहीं मिली या यतनी देर से मिली!......वइसे बिलैती और हिंदुस्तानी सिपहियन मा ई खुब चलत है और घूस के मामला मा ओनमा कौनो फरक नहीं है! हम जानित है कि साहब लोग घूस नहीं लेते लेकिन हमसे ज्यादा पढा-लिखा कयू मनई दावा से कहत हैं कि साहब लोग घूस लेत हैं! जब वै खुदै इहै काम करत हैं तौ और काव कहिहैं?.....

अब हम तुम पंचन का बताई इ किस्सन की असली बात। इ सब किस्सा लीन गे हैं किताब- किस्सा पांडे सीताराम सूबेदार तेरे। सूबेदार सीतारान (१७९७-१८८०) ईस्ट इंडिया कम्पनी औ फिर अंग्रेज सेना मइहां याक सिपाही केरि तरह काम कीन्हेंन। ऊइ पेंशन लइके रिटायर भे रहैं। सीताराम अवध इलाका क्यार रहैं और ऊइ खुदै अपनि आत्म कथा अवधी मइहां १८६०-१८६१ केरे बीच लिखी तेइन। बादि मइहां अहिक्यार अनुवाद अंगरेजी मइहां जेम्स नोर्गत कीन्हेन। ई किताब कित्ता खास रहै एहि क्यार पता एही बात तेरे चलत है कि अंग्रेजन क टाइम नौकरी खातिर आवै वालेन कइहां या किताब पढ़ब ज़रूरी रहै और एहि केरि याक परिच्छौ होति रहै।

किस्ता पांडे सीताराब सूबेदार क्यार जौन रूप अब मिलति है, वौ सीताराम पांडे क्यार लिखा ना आए। या किताब बाद मइहां मशहूर पत्रकार मधुकर उपाध्याय (पहिले उइ बीबीसी केरी हिंदी सेवा म रहैं फिर हिंदुस्तान आइके औरी औरी जगह काम कीन्हेन। सन १९१५ मइह सर गिरिजाशंकर वाजपेयी सिविल सेवा केरे अपने इंटरव्यू मइहा कहा तेइन कि या किताब सीताराम पांडे ने उनके दादा कइहां दीन तेइन। बादि म वोउ या किताब पढेन लेकिन बाद मइहां या किताब उनते कहूं खो गै। मधुकर उपाध्याय अहिका ढूंढेक बहुत कोशिश कीन्हेन लेकिन बेचरेउ ढूंढि ना पाए। फिर उइ यह किताब फिर ते लिखेनि अउर अवधी म लिखेनि। या किताब कुछ साल पहिले नई दिल्ली केरे सारांश प्रकाशन तेरे छपी रहै।